Savoir Plus Blog

Depuis volcan itomboke ; niko naji ambiya il faut ni andike tu.Sinon niko na sema ile kifukutu yenye bako na sema ike kuya tu, bic yangu ita tomboka na ina kufa bure. Ngoya niandike basi. Niliona sa mulikimbia akuna mwe alibeba dictionnaire, mulikuwa nauza tu ma megas ju musi rater uyu prophetesse wama hewa mwe aseme volcan ita tomboka iyi samedi. Kumbe na miye muta soma ibi.

Au fait, ni kweli hatukatale;ce n’est pas facile ku ishi mu 2020 wala mu 21 mu monde entier yote. Mais encore pire, ku ishi mu Nord-Kivu mu iyi time, tena jeune. Kuko bye bina kuwaka uku mpaka una acha t ku croire un moment ku avenir. Iko sa sa Frantz Fanon ali andikaka ile livre kama njo Les damnés de la terre , ali tumikishaka tu périphrase ju atu désigner. Ma vita, ma massacres, ma ubaguzi, na ma catastrophes naturelles hazi tu achiye ata mpepo. Apa inata eneya 30ans na Nord-Kivu iko na lungula, njo kusema tu mu luga yengine que myaka yote ya jeunesse ina zama mu damu ya bandugu yetu. Basi ata bi ishe na tuko na tuko na 35ans,ile ni bu jeunes kweli ? A part ma déceptions na ma ratés za maisha, muna waza kuko mwe ata ezi ji semesha aseme oh « la jeunesse c’est un état d’esprit » ? Hakuna njo. La jeunesse c’est avant tout cet âge où l’on se lève quand on veut,on s’amuse quand on veut. Kuko mwe alisemaka aseme la jeunesse est un risque à courir, mais uku mu Nord-Kivu, déjà la vie ayo peke c’est un risque à courir. Ju jeunesse ikuwe nini ??? Mu kiswahili tu ya vrai,jeunesse njo ile saa yenye bana ku itaka mutoto wa fulani mu quartier. Ata Yesu naye alikuwaka na itwa mutoto wa Mungu mu quartier yabo, la preuve est que hakuvukishaka 33ans.Ti leo tuna mu itaka mwana wa Mungu ju alikufaka jeune. Sasa muji imaginer batu banata eneza apa myaka ya Yesu na Nord-Kivu ni zone rouge tu.

Ile rouge ya vrai tuliona apa Goma samedi passé. Jirani yetu Nyiragongo alitomboka. Est-ce que ju tuli mu ima chumvi ? Est-ce que tuli kataliya batoto bake ku kulia mwetu ? Tuli mwanga buchafu yetu ku kiyalala yake ?En tout cas vraiment hatujuwe .Na kama iko na ma problèmes zake, njo akuye tu lunguziya ? Ba juristes muna sumbuwaka sana, au lieu mu déposer plainte pour violation de domicile, muna kimbiya ? Pole sana vraiment.

De toutes les façons, volcan ika sirika, Nyiragonga ika tomboka na OVG ina lala,tuka enda yi lamusha, tuka kuta ina lewa, tuka yi uziya maziwa ika récuperer. Ika sema haipokeyake tena. Sasa ina lewaka kila siku zaku toka wapi ?Mbone haiyaka sema ? Wala ina lewaka kila siku. Mbo, Paulo Coelho ali andikaka mu ile kitabu L’alchimiste
aseme ba fous na balevi bana kuwaka na Mungu wabo. Ikosa ule Mungu njo alaiachaka tuna enda lamusha OVG,mais kama ili lungulaka na ina lala tena na ina lewa ;maiti ya mulombe. Huruma ! Tena OVG ni organisme ya letà. Manake sa mina sema OVG mu one letà congolais.

Mbo,tuka kimbiya kwanza, mais tu kimbiliye wapi ? Rwanda ? Sake ? Mbinguni ? Kasumbalesa ? Buhene ? Kinshasa ? Bamoya baka sema comme mu vita ba civils bana kimbiliyaka ku ONU, nabo banata kimbiliya ku MONUSCO ; yaaaaaa baka kimbiliya ako baka kuta MONUSCO ili kimbiyaka depuis M23, zamani sana,kiekiekiekiekie ? baka cheka mais bon,basi. Kila mutu aka ikala fasi moya aka anza sema mtakatifu ya jina yake amu ombeye.Pale benye bashaka katala ma prénoms ya bazungu baka ishiwa.Big up kuba vaillants nègres hein !!! Mais par surprise, Mungu wa Africa njo aka kumbusha bile byenye Birago Diop alisemaka : « Les morts ne sont pas morts ».Ba morts baku Makao baka soresha laves,ika shuka tiiii Buhene. Goma yaba boss ika pona. Ba boss baka panda na ma IPhone, baka enda ji picha ma selfies ku ma débris za nyumba za ba maskini ba yesu. Basi, njo loi  ya nature mu dunia ya ma caricatures mutupu.

Alakini Ville ike bakiya alertée. Na mercredi soir wala jeudi matin ivi Gouverneur militaire aka sema maraba ba boss nabo ba kimbiye .Ba boss bata kimbiya weye maskini ubakiye ? Akose uko mulevi ! Ba maskini baka fwata ba boss souple. Bote baka enda Sake. Sa nili fika kule Sake nika ona batu bako na  ma gari ziko mu ma cours scolaires mais batu yote bana lala chini muma salles de classe. Nika sema mbone tuko kumbe ata batoto ya baba moja ? si tukuwe na gabula ku makuta bandugu. Aha, nani ani sikiye ! Sa volcan ita pita, biburi bita refaire surface, majivuno ita kuwa périmètre na kazarau ita kuwa formule. Pourtant saa iyi maskini na ba  boss bote bako confondus mu ma kanisa na ma masomo. Huruma !

Mais iyi gouvernement nayo haijuwe tawala. Utaezi sema Etat de siège na kila citoyen hana ata siège moya yaku ikala ako, asinziliye ata ako sa ana kimbiliya Sake ? Tuko Sake ndiyo, mais tuko na kula nini ?Tuko uku na shamba ? Ile plan de contingence njo nani tumuji débrouillerer uku atupe ata 1000fc tu saner ?Eh badi.

Ule Président ule mwe ana kuwaka souple ku adresser ma messages de condoléance ata Tchéchénie wala Tchécoslovaquie, mbone hatuya mu sikiya ?Akuye basi ata dimi ! boga institutionnalisé !!Mbo ata kama hakuye, haone kama Nord-Kivu tuko na bésoin ya ma mésures politiques  de compassion ? Apa tena après mutakuya tu lipisha ma taxes ? Mbone akose taxes zetu zili alimentaka caisse nationale de péréquation imaginaire pendant des années ? Siye hamuwezi tu fanyiziya vile ? Magumu ivi mais toujours deuxième province sur le plan de la mobilisation fiscale ,shukrani hakuna ! Tu saigner Beni,Rutshuru,Masisi,Lubero,Walikale na Goma kwe tulikuwa na pumuliya nako apa kuna lumiya mais nyiye niku tu faire saigner tu ? Ata njo.

Mbo,kama hausikiyake kiswahili ngoya niku ambiye mu Tshiluba résumé ya ibi byote : « Mr le Président, mbunchi mbwa kambila balibudimbilaka mu province ya Nord-Kivu Goma tchimpampa ».

Bon,siye population ya Goma tubakiye tu ginsi tuna kuwaka, siye tu njo résilience mu kiswahili ata kama bana anzaka profiter na résilience yetu. Ma données scientifiques zingali na onesha danger. Manake tukuwe tu prudents. Kisha tuta rentrer tuna faire vibrer tena mungini yetu comme d’hab. Si vile ? Goma la bele-rebelle, hahaha. Goma njo nyumbani bandugu.

Sasa na weye Nyiragongo, tufe aye ?Si ba jirani bana ikalaka bana sikilizana tu ? Problème ni nini ? Bazee aseme tuku tafutiye fille vierge wa 25ans mu Goma ? Mbone maraba examen ile papa voisin, ivi na ule nyamulagira naye anata omba ! Weye inge kuwa ata weye utaezi mu pata mu Goma ?Papa voisin,usi tume mwenzako bye hauwezi penda baku tume ! Bon, hatuna choix alakini. Tuta mu tafuta,tuta mu leta !

Par Jacinthe MAARiFA